DATO: 14. februar 2009
DELTAKARAR: Martin Hauge, Arild Sundal, Terje Rosnes og Gunnar Nødseth.
STAD: Området ved Aralden.
BÅT: ”Isabel”, med skipper Øyvind Storesund.
VÊR: Frisk, kald, søraust bris, sluddbyger og generelt ufyseleg.
ARTAR: Sei, torsk, lange, brosme, uer og hyse.

I sludd og grisevêr plukka Martin Hauge mest konkurransepoeng i den forseinka romjulskonkurransen. Men Wiggo Heimtun leiar framleis klubbcupen etter tredje runde.

Turen 14. februar var lagt opp som ein kombinasjon av forseinka romjulstur og tredje konkurranse i cupen om den gjeve snella frå Penn. Deltakarane håpte på rikeleg med vintertorsk på denne turen, etter som det hadde blitt teke ein del eksemplar tidlegare i januar. Alt skulle dermed tyde på at innsiget var i gang. Men om fisken var der, ville han i alle fall ikkje ta. Ekkoloddet viste mykje stor fisk, men han beit ikkje. Dei fire deltakarane prøvde kilovis av ulike pilkar, men til fånyttes. Etter eit tids fiske sette Arild Sundal i ein stor fisk, som skulle vise seg å bli den største på turen og årets største i klubben så langt: Ei lange på 9,8 kilo. Elles vart det teke ein del sei over minstemålet på 40 cm. Martin Hauge, som hadde sin første tur med klubben, slo til og vann heile konkurransen. Martin tok dermed sitt første napp i romjulspokalen. Dessutan vann han ein DAM-bag for oppbevaring av pilkar.

Arilds lange vart ikkje målt, men vekta er registrert og bevitna.
Wiggo Heimtun deltok ikkje på denne turen, men leiar framleis cup-konkurransen. Men han må passe på, om han skal vinne. Det er svoltne karar som kjem etter.

Resultat tur 3 og romjulstur

Nr	Navn	Poeng	Total vekt	Totalt poeng
1	Martin Hauge	35	9	5	44	5
2	Arild Sundal	20	12	4	32	4
3	Gunnar Nødseth	25	3	0	28	0
4	Terje Rosnes	15	1	7	16	7

Samanlagtresultat, etter tre turar:

Namn	Tur 1	Tur 2	Tur 3	Totalt
1. Wiggo Heimtun	12	12	0	24
2. Gunnar Nødseth	10	0	9	19
3. S.E. Hendriksen	9	9	0	18
4. Arild Sundal	7	0	10	17
5. Terje Rosnes	0	8	8	16
6. Martin Hauge	0	0	12	12
7. Helge Johnsen	0	10	0	10
8. Ivar Knapskog	8	0	0	8

Referat: Gunnar Nødseth/Helge Johnsen

SOLID LANGE: Arild Sundal har fått langa si vel ombord. Største fisk så langt i år er eit faktum

SMÅFALLENT: Ekkoloddet viste mykje fisk, og vintertorsken skulle vere der. Men dei torskane som vart tekne, var små

VANN: Martin Hauge (t.v.) blir gratulert av klubbleiar Gunnar Nødseth, etter at turen er over.